Bədə xəbə oməy, çəmə istedodinə şair Nurəddin Rəhimovi ıştə dınyoj dəqiş kardə.
Nurəddin ŞAYA ( Rəhimov Nurəddin Xanoğlani zoə). 1970-minnə sori aprelə manqi 10-ədə Lik rəyoni Orand diyədə təvəlludıj sə. 1997-minnə sorədə LDU təbiyyət fakultəj, 2002-minnə sorədə həmunə ali məktəbi aspiranturaj oroxniyə.
Dəvardə əsri 90-minnə sori sıfonku deştə tolışə, tırkə şeiron mətbuatədə bə əhandon didor beşə..
Lankon şəhər, 7 №-nə miyonnə məktəbi dərsə hissə mudire, həmən məktəbədə riyaziyyat fənni tədris kardedəbe Azərboycon Ənıvışton İyəti uzv be.
Ve əfsuson çəmə bə iyəndı ənədə biqonə, sardon bey nətecəye ki, əçəy hol-əhvoliku vaxti-vaxtədə xəbədo bənimon.
Bə çəmə ədəbiyyot əhli, bə Nurəddin miəllimi el-avlodon dılvandi doydəm. Vırəş vəyşt bıbu!
BOY
Əğıl bəney mıni çənə əcəl hey?
pot-pot bıbom, ivrədə əv cəme, boy!
İşdən bə ğarz eqınim çı Xıdoku,
işdı ğarzım çı dınyoku səme, boy?
İqlə bedə Nuh əyyamo dardi ro,
kəfən dutdəj boşdə, boli, dardi ro.
Dıqlə bıbu çı dınyoku barde ro,
qıləy peqət, qıləy dəvard bomı, boy!
Xıdo bəmə i rujiyən baxşdəni,
im dard tıni bo şəv karde haşdəni.
Dınyo əğil mardə həşi çoşdoni,
boy çəy səpe ası ekə, bəme boy!
ŞE NIBU...
Zılməti qıyədə tı qıləy ruşnə,
ha vəşdəş, orəxe zındənij, boçi?
De eşqi botıno vılim perışdə,
omdənij ım dıli çındənij, boçi?
Votdənim ım caşon ası xıl bedə,
kovrədə vində bə diyo orəxı?
Osmoni boloku çaş nığıl bedə,
nəvedə caşonım deşdı sorəxi!
Boçi be xəbə şij? oxir şe nıbu,
çı rə ginı karde tazix-mızonı?
Kulok bəçımı roy livə eşandə,
voşi dərandəje lınqə rizonı!
Zılmoti qıyədə ruşnə bij əni,
umrım oroxniye botıno nəve.
Jıko anqılı jə, anqıl obdəni,
perışyə rüjonım sə qıləy şəvi!
Jıko bexəbə şij, oxı boçi tı?
Boçi bexəbə şij? oxır şe nıbu!
DINYO
Ağlıj sədə bə rujədə
merdon əzandi ın dınyo!
Çəy şikil bə xərito
kuçon şəhəro,
livon doyku dəvardi!
Isə şəhəron kuçono,
don livono,
lu bə bolojku
duyəvul, iyən randəmu dəvardə!
Səyku bə po bə çəmə kuçə dəmandə
ım dınyo!
KILO
Haki şedə sipiyə şəy,
ha ki omdə kılo vıjdə.
Kılo heste milləti nom,
kılo heste sə dəvıjdə.
Odəm vindəm sə tırnedə,
lınqi zınəy doydə bə sə.
Dınyo kanə şəy dırnedə,
tojə kılo noydə bə sə!
Hınə heste sıre-sıre
iştə nomi bıqət bışi!
Oqordın çəy sipiyə şəy,
dınyo kılo peqət bışi!
Ənvışt: Nurəddin Şaya (Rəhimov)
Məqalə çı Mirfayaz Likməkaniku peğətə bə